الطعن في قرارات المحافظ العقاري

الفرق بين المقاولة والشركة: واش ضروري تأسّس شركة باش تبدأ المشروع ديالك؟

كيقولو بزاف ديال الناس، وخاصة الشباب الطموح لمستقبل أفضل:

"بغيت نفتح مشروع صغير، ولكن واش ندير شركة ولا نكتفي بالمقاولة؟"

هنا خاصنا نفهمو مزيان الفرق بين "المقاولة" (Entreprise) و"الشركة" (Société)، باش كل واحد يعرف شنو يختار على حساب وضعيتو القانونية وطبيعة المشروع ديالو.

✅ أولاً: شنو هي المقاولة؟

1- تعريف المقاولة: 

المقاولة هي ببساطة: أي نشاط اقتصادي منظم، الهدف ديالو هو الربح، سواء كتخدم بوحدك أو مع ناس آخرين.

👷‍♂️ مثلاً:

- مول الطاكسي => مقاولة.

- واحد كيدير تصبين => مقاولة.

- حتى لي كيبيع فـ Instagram ولا TikTok => مقاولة.

ماشي ضروري تكون عندك شركة مسجلة فالسجل التجاري باش تتسمى مقاولة.

يمكن تكون مقاول ذاتي (Auto-entrepreneur)، أو غير مسجّل لكن كتدير نشاط اقتصادي.

🔸 بالفرنسية:

L'entreprise est une unité économique qui exerce une activité professionnelle dans le but de réaliser un bénéfice.

2- أنواع المقاولات في المغرب:

المقاولات فالقانون المغربي كتنقسم حسب الحجم ديالها والنشاط والهيكلة. إلى:

• 🟢 المقاولة الصغيرة جدًا (Très Petite Entreprise - TPE)

هادي هي أصغر نوع. كتكون:

إما مقاولة فردية.

أو شركة صغيرة بزاف.

العاملين فيها ما كيتعداوش 5 الناس.

ورقم المعاملات ديالها ضعيف (أقل من 3 مليون درهم فالغالب).

💬 بحال واحد خدام فالصباغة، أو عندو محل صغير ديال التليفونات.

• 🟡 المقاولة الصغيرة (Petite Entreprise)

كتكون أكبر شوية من TPE.

فيها عدد محدود من العمال (مثلاً 10 حتى لـ 50).

ورقم معاملات متوسط.

🧑‍🔧 بحال مقاولة بناء صغيورة أو مكتب دراسات هندسية.

• 🟠 المقاولة المتوسطة (Moyenne Entreprise - ME)

كتكون منظمة مزيان، وعندها هيكلة إدارية.

كتخدم عدد مهم من المستخدمين.

ورقم المعاملات ديالها كبير شوية (مثلاً من 10 حتى لـ 50 مليون درهم أو أكثر).

💡 بحال شركات تصنيع محلية، أو وكالات إشهار كبيرة.

• 🔴 المقاولة الكبرى (Grande Entreprise - GE)

هادو الشركات الكبار.

عندهم استثمارات كبيرة، وعشرات أو مئات المستخدمين.

وعندهم أنظمة قانونية وهيكلية صارمة.

ممكن يكون عندهم فروع فمدن أو دول مختلفة.

🏭 بحال شركة ديال الاتصالات، أو شركة صناعية كبيرة.

✅ ثانياً: شنو هي الشركة؟

1- تعريف الشركة: 

الشركة (Société)، فالقانون المغربي، هي:

اتفاق بين شخصين أو أكثر باش يديرو مشروع اقتصادي، ويشاركوا في الأرباح والخسائر.

يعني: الشركة هي شكل قانوني منظم للمقاولة.

📝 خاصها:

عقد مكتوب (Statuts juridiques)

التسجيل فالسجل التجاري (RC)

رقم تعريفي موحّد (ICE)

ومسؤول قانوني كيتسمّى "المسير"

🔸 بالفرنسية:

La société est une personne morale créée par contrat entre deux ou plusieurs associés qui mettent en commun leurs apports pour exercer une activité et partager les bénéfices.

2- أنواع الشركات: 

🏭 الشركة فالمغرب تتنقسم لقسمين هما:

أ-  شركة الأشخاص (Société de personnes)👷

التركيز فيها على العلاقة بين الشركاء، والثقة بينهم.

المسؤولية ديال الشركاء غالبًا شخصية (كيكونو مسؤولين حتى بفلوسهم الخاصة).

الانتقال ديال الحصص أو الشراكة صعيب، خاص موافقة جميع الشركاء.

أنواع شركة الأشخاص:

• 🟢 شركة التضامن (Société en Nom Collectif - SNC)

الخصائص:

• الشركاء مسؤولين تضامنياً على ديون الشركة.
• ما كاينش فصل بين المال الشخصي ومال الشركة.
• خاص الثقة كبيرة بين الشركاء حيث كل واحد مسؤول كامل على ديون الشركة.
• العدد: خاص يكون على الأقل جوج ديال الشركاء.

مثال: مجموعة ديال صحاب دارو مشروع خدمات، وكل واحد مسؤول على ديون الشركة حتى بفلوسو الخاصة.

• 🟢شركة التوصية البسيطة (Société en Commandite Simple - SCS)

الخصائص:

• فيها جوج أنواع ديال الشركاء:
• الشركاء المتضامنون (commandités): مسؤوليتهم تضامنية وغير محدودة.
• الشركاء الموصون (commanditaires): مسؤوليتهم محدودة فالمبلغ اللي مساهمين به، وما كيسيروش الشركة.
• هذا النوع كيخلي المستثمرين اللي ما بغاوش يدخلو فالتسيير يساهمو براس المال.
• العدد: كيتطلب جوج ديال الشركاء على الأقل (واحد متضامن وواحد موصٍ).
• مثال: فنان دار شركة مع مستثمرين، الفنان كيسير والناس اللي مساهمين غير مستثمرين.

• 🟢شركة المحاصة (Société en participation) 

(هاد النوع أقل انتشارًا وكتكون غالبًا بدون تسجيل رسمي)

الخصائص:

• عقد بين شريكين أو أكثر باش يديرو مشروع معين.
• ما كتكونش شركة بمعنى قانوني واضح، ولكن شراكة مؤقتة.
• المسؤولية كتعتمد على العقد بين الأطراف.

ب- شركة الأموال (Société de capitaux)

التركيز على رأس المال أكثر من الأشخاص.

المسؤولية ديال المساهمين محدودة في حدود الأسهم اللي مساهمين بيها.

الحصص والأسهم كتقدر تتباع أو تنتقل بسهولة، بلا ما تحتاج موافقة الجميع.

• أنواع شركات الأموال:

شركات الأموال كتكون مركزة على رأس المال، والمسؤولية ديال المساهمين كتكون محدودة فحدود رأس المال ديالهم. كيتسمو كذلك "Sociétés de capitaux" لأنها كتدار على أساس رأس المال أكثر من الأشخاص.

• 🟠شركة ذات المسؤولية المحدودة (SARL - Société à Responsabilité Limitée)

الخصائص:

• كتتأسس بين شخص واحد أو أكثر (حتى 50 شريك).
• رأس المال مقسم على حصص (parts sociales).
• المسؤولية ديال الشركاء محدودة فحدود رأس المال.
• إدارة مرنة مقارنة مع شركات المساهمة.

• 🟠شركة مساهمة (SA - Société Anonyme)

الخصائص:

• كتطلب على الأقل 5 مساهمين.
• رأس مال كبير ومقسم على أسهم.
• الإدارة ديالها بتشكيلة مجلس إدارة وهيئة مراقبة.
• الأسهم يمكن تداولها بحرية في بعض الحالات.

مثال: شركات كبيرة بحال شركات التأمين أو البنوك.

• 🟠شركة التوصية بالأسهم (SCA - Société en Commandite par Actions)

الخصائص:

• مزيج بين شركة مساهمة وشركة توصية.
• فيها شركاء تضامنيين مسؤوليتهم غير محدودة.
• وشركاء مساهمين (محدودي المسؤولية) عندهم أسهم.
• غالبًا كتستعمل فالمشاريع الكبيرة اللي فيها مستثمرين كبار.

• 🟠شركة التعاونيات (Société Coopérative)
• كتجمع بين الأفراد اللي عندهم هدف مشترك، بحال الفلاحين أو الحرفيين.
• المسؤولية ديال الأعضاء محدودة.
• كتخدم على مبدأ التعاون والمساعدة.

مثال: شركة كبيرة عندها آلاف المساهمين، كل واحد مساهم برأس مال، وما مسؤولش على ديون الشركة أكثر من اللي دفع.

✅ ثالثا: الفرق الرئيسي بين المقاولة والشركة

أ- المعنى:

المقاولة: نشاط اقتصادي كيقدرو يديروه أفراد أو مجموعات.

الشركة: كيان قانوني مستقل كيتأسس بموجب عقد.

ب- الشخصية القانونية:

المقاولة: ماشي دائما عندها شخصية معنوية (مثلاً المقاول الذاتي أو المقاولة الفردية).

الشركة: عندها شخصية معنوية مستقلة على الشركاء.

ج- التأسيس:

المقاولة: التأسيس سهل، وحتى بلا عقد (مثلاً المقاول الذاتي يتسجل فقط).

الشركة: خاصك عقد التأسيس + التسجيل فالسجل التجاري + إجراءات قانونية.

د- المسؤولية:

المقاولة: المسؤولية شخصية، يعني الديون كاتلزم صاحب المقاولة مباشرة.

الشركة: المسؤولية غالباً محدودة حسب الشكل القانوني (SARL، SA...).

ه- اللغة الرسمية / الاسم:

المقاولة: كتخدم غالباً باسم صاحبها (الاسم الشخصي).

الشركة: عندها اسم تجاري وقانوني (dénomination sociale) مستقل.

🧠 مثال من الواقع:

"حميد" خدم عامين ففرنسا، جمع شوية ديال الفلوس، وبغى يدير مشروع ديال النجارة فالمغرب.

فاش بدا يخدم بوحدو، تحت اسم حميد النجار = مقاولة فردية.

منين دار شراكة مع خوه وصاحبو ودارو 150.000 درهم كرأس المال = شركة SARL

📌 واش ضروري تأسس شركة؟

💡 الجواب:

ماشي ضروري، ولكن فبعض الحالات كيكون مفيد بزاف.

⏪ تأسيس شركة كيكون مناسب إلى:

• كتخدم مع ناس آخرين (شركاء).
• باغي تستفد من المسؤولية المحدودة.
• ناوي تدير مشروع كبير أو تمويل بنكي.
• باغي ثقة أكثر من الزبائن والموردين.

💬 خلاصة سريعة:

"المقاولة هي النشاط... والشركة هي الشكل القانوني لهذا النشاط."

"Entreprise c'est l’activité, Société c’est la forme juridique."

✅ رابعا: 🎁 BONUS: حمل دليل PDF مجاني!

إليك أهم القوانينن المنظمة للمقاولة والشركة:

• مدونة التجارة:

تُنظم النشاط التجاري، السجل التجاري، المحل التجاري، الأوراق التجارية، وصعوبات المقاولة.

• قانون الشركات 5.96:

يُؤطر تأسيس وتسيير الشركات (SARL، SA، SNC...).

• قانون المقاول الذاتي 114.13:

يُحدد شروط الاشتغال بنظام المقاول الذاتي، الامتيازات، والسقف المالي السنوي.

• قانون التعاونيات 112.12:

يُنظم إحداث وتسيير التعاونيات، وأهدافها التضامنية.

• مدونة الشغل 65.99:

تُؤطر علاقة الشغل داخل المقاولة (الأجر، العقوبات، التغطية الاجتماعية...).

• المدونة العامة للضرائب:

تُحدد الضرائب المفروضة على المقاولة (IS، IR، TVA...).

• قانون البنوك 103.12:

يُؤطر العلاقة مع المؤسسات البنكية والمعاملات المالية.

• قانون الصرف:

يُحدد قواعد التعامل مع الخارج (الاستيراد، التصدير، تحويل الأموال...).

• قانون حماية المستهلك 31.08:

يُلزم المقاولة باحترام حقوق الزبون (الجودة، الضمان، الإعلام...).

• قانون المنافسة والأسعار 06.99:

يُمنع الاحتكار والتفاهمات المخلة بالمنافسة الحرة.

• قوانين قطاعية خاصة:

حسب مجال النشاط (الفلاحة، الصيدلة، البناء، الصحافة...).

⬇️ يمكن تحميل كل هذه القوانين من خلال الولوج للبوابة القانونية لوزارة العدل.

تعديل المقال